عـايـز تـعـرف هــتـمـوت امـتـي اتـصـل بـ 0900

السلام عليكم ورحمة الله وبركاته

بصراحة الموضوع بتاع 0900 ده زاد عن حده اوي

وبقي كتير اوي

وحبيت اعرف رايكم ايه في 0900

زمااان كده ايام القناه الاولي وايام المسلسل بتاع الساعه 8 فاكرينوا طبعا كان في اعلان غريب بييجي فيه البنت وماسكه جهاز عجيب كده وقاعده تنطتت علي موسيقي الاغاني ..وتيجي تقولك عايز نغمات لموبايلك هتلاقي عندنا اتصل ب0900..وانا اقعد ادور في الاعلان علي الموبايل ده اني الاقيه ...! ابدا مش عارفة هو فين

لحد لما عرفت ان البتاع الصغير ده طلع اسمه موبايل وبدات السنوات تتوالي ومعاها الاعلان ده وبقت كلمه 0900بتسمعها في اليوم اكتر من انك تسمع اسمك اه وربنا بقيت طول اليوم 0900 0900 0900
بين اي مسلسل او قبل الماتش في اي حته يحشرو كلمه 0900حسيت اني وانا نايمة وبحلم الاقي يفطه سنعود وييجي اعلان 0900 في نص الحلم يخلص وبعدين ييجي عدنا واكمل الحلم بردون مع 0900

0900ده بتاع كله والحمد لله مش حارمينا من حاجة !
وكمان بدات خدمات 0900في الزياده الله يكرمها يعني في 0900

للموبايلات الرنات والرسائل وبرامج الموبايلات وبقي في للمطبخ 0900
مش بتعرفي تطبخي وعايزه تتعلمي ..جوزك بيحب الباميه وانتي مش بتعرفي تطبخي الباميه ..سيبك منه واتصلي ب0900
متختخه وكل ما حد يشوفك يقولك دبدوبه التخينه ولا يهمك الحل عندنا اتصل هنتخنك اكتر بس اتصلي ب0900حياتك بؤس ومش طايق نفسك قبل ما تنتحر اتصل ب 0900
صاحبتك القديمه قلبتك..مراتك طلقتك..جوزك ضربك..اخوك ولع فيك ومش عارف تعمل ايه ؟؟اتصل ب 0900

في التليفون فضفض متتكسفش
وبدات تتوغل في كل ارجاء حياه الانسان حتي الخصوصيه علاقتك الزوجيه مش كويسه الايام دي ليه بس كده اتصل ب0900
زعلان مع مراتك لييييييييييه؟؟ يا راجل طلقها
لاالحل عندنا اتصل ب0900

وبعد ما غطت ع الحياه الخصوصيه للبني ادم ..تسكت يععني لا لا لا ازاي شافتلنا حاجه تانيه وفعلا كتر خيرها لقت حل عشان تساعد البشريه بسؤال عن دينك الاسلامي وعايز تعرفه اتصل ب0900
وكمان لو عايز رنات اسلاميه ودينيه وعايز خطب حاضرين انت تؤمر من عيني اتصل انت بس علي 0900
طب ومش هنسيب الاخوه المسيحين دول غاليين علينا عايز رنات مسيحي اتصل ب 0900
لو عايز اجابه عن سؤال بدور حول دينك المسيحي اتصل 0900
عايز مسحراتي يصحيك ب اسمك ع السحور اتصل ب 0900
عندك مشاكل ف شعرك المعفن اتصلي ب 0900
خطوبيتك بكرة ومحضرتيش هتلبسي ايه اتصلي ب 0900
عايز تكسب عربية 2020 عدية العيد اتصل ب 0900
مشاكل ف بشرتك تعالي عندنا الحل 0900
عايز تعرف حظك وحظ حبيبك وهتكملو مع بعض ولا
والطقس ايه ( يارب تمطر عليكم ) اتصل ب 0900
حياتك العاطفية فيها مشاكل ولا يهمك الحل مع 0900
ده انت لو عايز تطلع عمرة هتتصل ب 0900
عايز تجوز وتفرش بيتك هنجيبلك التلاجة مع 0900
مش لاقية عريس اتصلي ب 0900
ويا بخت من وفق راسين ف الحلال
ده 0900 بتعمل افرح كمان ببلاش بس جاوب ع الاسئلة
عايز تقاسم المتسابق حظه ف اللعبة وتاخد نص ال هيكسبه
اتصل ب 0900
( وعشان كده محدش بيكسب خالص )

نفسي اعرف مين صاحب 0900

يعني الحمد لله كده قدرت ستنا وتاج راسنا 0900 انها تلبي خدمات البشريه كلها لدرجه اني حسيت بجد ان ممكن يطلع في يوم يقولك عايز تعرف هتموت امتي اتصل ب0900
ناس طيبين قوي وع نياتهم وقلبهم ابيض
وقدروا يحلوا مشاكل الشعب كله ونسيوا الطبقه المطحونه اللي طالع عينها يعني مسمعتش للشكاوي ولخدمه الناس اتصل ب0900..

يعني يوصلوا صوت المواطن ده او شكوته للمسؤل فلان او علان املا في انه يحلها وده يدل علي ان 0900 قايمه علي فكره تجاريه بتدور علي العالم الفاضيه اللي مش وراها غير الهلس والعبط

للرد علي الموضوع ده ياريت تتصل ب0900

انا عايزة اعرف رايكم ايه بجد ف ظاهرة 0900
ظاهرة ظهرت بكثرة كبيرة اوي وانتشرت بدرجة كبيرة جدا
طيب وهل هي فعلا بتحل كل مشاكل الناس وبتقدر تساعدهم ؟؟؟؟؟؟؟؟
وتجيبلهم شقة وعربية وكمان بتعملهم الفرح ببلاش وتطلعهم م الخنقة
وتجاوبهم ع اسئلتهم هل 0900 بتعمل كل ده

ولا هو عبط وهلس بجد وناس بتلم فلوس م الهوا وخلاص
والمشكلة تلاقي ناس كتير اوي بتتصل وتصدق الكلام

هل بقي دي طيبة منهم ولا ال معاه قرش محير

يتصل ب 0900 ويبخره

والصراحة تتقال كلام سر يعني

انا كنت بتصل ب0900 كل يوم
بس زمان كنت الاقي جايزة 100 الف جنيه
وسؤال سهل جدا اروح متصلة بس اكتشفت ان فاتورة

التليفون بتيجي جامدة وكله بسبب 0900

لا بجد والله فعلا جربت قبل بس اكتشفت ان ده ضحك ع الدقون
ولا حاجة بتحصل وناس عايزة فلوس م الهوا

مـــــــــــــــــــــــنـــــــــــــــــــــــــقـــــــــــــــــــــــــــــــــول

ف انتظار ردودكم ع 0900